Fréttir

Málstofa sem er ætluð fyrir stjórnendur og fagfólk. Málstofan verður haldinn í Herkastalanum að Suðurlandsbraut 72 í Reykjavík, 14. apríl 2026. Stjórnendur sem hafa áhuga á að styðja við velferð, hæfni/getu og seiglu síns starfsfólks og auka gæði og öryggi þjónustunnar. Fagfólk sem sinnir þjónustuþegum með flóknar þarfir og vill efla fagvitund sína og starfsánægju.  Þessi málstofa mun m.a. fjalla um ávinning þess að nýta sér handleiðslu, hvað við skiljum sem faglega handleiðslu, hvaða hæfni er alþjóðlega viðurkennd fyrir faglega handleiðslu og hvaða sannanir eru til um ávinninginn af reglulegri faglegri handleiðslu fyrir þjónustuþega, starfsfólk, stjórnendur og stofnanir/fyrirtæki. Regluleg fagleg handleiðsla á sér langa hefð og er sífellt að verða meira viðurkennd sem stöðluð fagefling út alla starfsævina innan fjölbreyttra fagstétta. Áður fyrr var fagfólk, klínískir eða faglegir handleiðendur án sérstakrar þjálfunar fyrir hlutverkið. Þau erfðu yfirleitt handleiðsluhlutverkið einfaldlega vegna starfsreynslu á sínu sviði. Hins vegar er klínísk og/eða fagleg handleiðsla nú alþjóðlega viðurkennd sem sjálfstæð faggrein. Dagskrá 08:15 - 08:30 Þátttakendur boðnir velkomnir. 08:30 – 09:45 Þroski handleiðslu sem sérstaks fags: Alþjóðlega viðurkennd hæfni og þverfagleg, þverfræðileg líkön. 09:45-10:00 Hlé. 10:00-11:00 Hvaða sannanir eru fyrir ávinningi og virkni handleiðslu? 11:00-11:10 Hlé. 11:10 – 12:00 Að huga að starfsnámi og seiglu til að styðja við faglegt starf. 12:00-12:15 Málstofu lokað. Hlekkur á skráningu hér: https://www.handleidslusetur.is/book?event=M%C3%A1lstofa%20me%C3%B0%20Aisling%20McMahon%20-%20G%C3%A6%C3%B0astimpill%20faga%C3%B0ila%20-%20Fagleg%20handlei%C3%B0sla&date=14.%20apr%C3%ADl%202026&type=event Með hlýrri kveðju Handleiðslusetur

Handleiðslufélag Íslands sendi nýverið út til fyrirtækja og stofnana skjal um innleiðingu á handleiðslu. Um er að ræða skjal sem nýtist við innleiðingu á handleiðslustefnu til að efla og styðja við starfsfólk og fagþróun. Boðið var upp á fjarfund í kjölfarið þar sem farið var yfir handleiðslustefnu og innleiðsluskref. Öllum er velkomið að nýta sér skjalið að vild og aðlaga það að sínum vinnustað.

Alúð í lífi og starfi. Örugg höfn fagaðila. Nýlega var Handleiðslusetur sett á laggirnar sem er staðsett mjög miðsvæðis í Reykjavík, þjónustan er þó líka hugsuð fyrir fólk á landsbyggðinni.
Handleiðslusetur býður upp á faglega handleiðslu fyrir stjórnendur og fagfólk – einstaklinga, hópa og teymi – þar sem áhersla er lögð á öryggi, fagmennsku og vellíðan í starfi. Þá er einnig boðið upp á faglega handleiðslu á handleiðslu og stefnt að því að styðja við faglega handleiðara með fræðslu og viðburðum. Næst á dagskrá er vinnustofa með Dr. Aisling McMahon og Vilborgu Guðnadóttur þann 15. apríl nk.
Handleiðslusetur stendur lika fyrir málstofu í apríl n.k. fyrir stjórnendur og annað fagfólk sem vill kynnast faglegri handleiðslu og þeim ávinningi sem hún felur í sér.
Á málstofunni verður fjallað um: hvað fagleg handleiðsla er og hvernig hún styður við faglegt starf ávinning faglegrar handleiðslu fyrir einstaklinga, teymi og stofnanir hvernig fagleg handleiðsla getur aukið öryggi, fagvitund, samheldni og vellíðan í starfi.
Markmiðið er að efla skilning á mikilvægi faglegrar handleiðslu í nútíma starfsumhverfi og hvetja stofnanir og fyrirtæki til að nýta sér hana sem hluta af gæðastarfi sínu.

Frekari upplýsingar um málstofuna, vinnustofuna, fyrirlesara og um Handleiðslusetur má finna á www.handleidslusetur.is eða á fésbókarsíðu Handleiðsluseturs.

Handleiðslufélag Íslands – Handís fagnar nú 25 ára afmæli en félagið var stofnað 23. júní árið 2000. Stofnfélagar voru fyrstu nemendur sem útskrifuðust úr diplómanámi í handleiðslufræðum frá Endurmenntun Háskóla Íslands ásamt kennurum. Mikill metnaður og framsýni einkenndi félagið frá upphafi. Haldnir voru fræðslufundir í hverjum mánuði þar sem félagar skiptust á að vera með erindi og í kjölfarið voru fyrirspurnir og umræður. Fréttabréf voru gefin út og þar voru kynntar áhugaverðar bækur og ýmis fróðleikur. Hugað var að gæðamálum og útbúið staðfestingarblað fyrir félaga til að staðfesta handleiðlsu. Segja má því að gæðaviðmið fyrir handleiðslu hafi frá upphafi verið að handleiðari væri félagi í Handleiðslufélagi Íslands. Mikil gróska var í félagingu og stax var farið að huga að norrænu samstarfi og kom meðal annars Benedicte Schilling frá Danmörku til Íslands og var með námskeið/fræðslu fyrir félagsmenn.  Hún skrifaði eftir dvöl sína á Íslandi í tímaritið Systemisk Forum  sem er danskt fagtímarit um að felst norðurlöndin væru komin með þverfagleg fagfélög á sviði handleiðslu og hvatti til þess að slíkt félag yrði einnig stofnað í Danmörku líkt og búið væri að gera á Íslandi. Evrópusamtök handleiðara (e. Association of National Organisations for Supervision in Europe – ANSE) voru stofnuð árið 1997. Handleiðslufélag Íslands gerðist samstarfsaðili ANSE árið 2010 og fékk síðan fulla aðild árið 2024. Noregur og Svíþjóð eru einnig með fulla aðild að ANSE en Finland með samstarfsaðild. Danmörk og Færeyjar eru einu norðurlöndin sem ekki eru með aðild að ANSE enda hefur ekki enn verið stofnað þverfaglegt handleiðlsufélag þar sem landssamtök. Nám í handleiðslufræðum á Íslandi má rekja til ársins 1978 en þá efndi hópur metnaðarfullra sérfræðinga innan geðsviðs Landspítalans til skipulegs samstarfs um sjálfsnám og þjálfun í handleiðslufræðum. Hópurinn fékk til sín sérfræðinga frá Svíþjóð og Bretlandi sem höfðu þekkingu og reynslu af því að skipuleggja þjálfun í handleiðslu. Kristín Gústavsdóttir, félagsráðgjafi sem starfaði við Familjeinstitutet í Gautaborg í Svíþjóð, sá um faglega leiðsögn fyrir hópinn í þrjú ár.  Í framhaldinu var síðan efnt til skipulegs tveggja ára náms í handleiðslufræðum fyrir þverfaglegan hóp innan geðdeildar Landspítalans. Þverfaglegur hópur (geðlæknir, félagsráðgjafi og sálfræðingur) myndaði námsnefnd og dr. Sigrún Júlíusdóttir stýrði náminu með ráðgjöf Kristínar Gústavsdóttur. Þær skrifuðu síðan saman grein árið 1990 um líkan námsins, framkvæmd þess og gagnsemi. Næsta áratuginn voru nokkur námskeið haldin á vegum Tengsla sf. og Endurmenntunarstofnunar Háskóla Íslands og sáu Nanna K. Sigurðardóttir og dr. Sigrún Júlíusdóttir um þau námskeið ásamt styttri kynningar- og framhaldsnámskeiðum. Árið 1999 hófst síðan þriggja missera diplómanámsleið við Endurmenntun Háskóla Íslands og henni lauk árið 2000 með þeim öfluga hópi sem stofnaði Handleiðslufélag Íslands eins og áður sagði. Frá árinu 2017 hefur þverfaglegt nám verið kennt við Háskóla Ísland innan Félagsráðgjafardeildar og hafa um 100 manns lokið náminu.  Handleiðslunámið er þverfræðilegt nám að loknu háskólanámi til starfsréttinda á sviði félags-, heilbrigðis- eða menntavísinda. Markmið námsins er að nemendur öðlist þekkingu og skilning á handleiðslufræðum og færni til að veita handleiðslu í faglegu starfi og skipuleggja handleiðslukerfi á vinnustað. Nemendur læra að beita kerfisnálgun og dýnamískri sýn til að skilja samskipti milli einstaklinga, faghópa og í stofnanasamstarfi. Námsleiðin er ekki kennd skólaárið 2025-2026 en voandi mun verða tekið inn í námið fyrir skólaárið 2026-2027.               Í dag eru alls 70 manns með fulla aðild að Handleiðslufélagi Íslands en einnig geta nemar í handleiðslufræðum fengið nemaaðild og eru um 10 manns með slíka aðild. Óhætt er að segja að það er fjölbreyttur hópur fagaðila innan félagsins og allir ættu að geta fundið sér handleiðara. Margir hverjir veita einnig handleiðslu í gegnum fjarþjónustu sem er mikilvægt fyrir fagfólk á landsbyggðinni sem og þá sem starfa erlendis en vilja fá handleiðlsu frá íslenskum handleiðara.               Fyrir rúmu ári síðan lauk dr. Díana Ósk Óskarsdóttir doktorsnámi í félagsráðgjöf með áherslu á handleiðslufræði. Heiti doktorsritgerðar hennar er Þekktu sjálfa/n þig. Eigindleg rannsókn á upplifun presta innan þjóðkirkju Íslands á handleiðslu (e. Know Thyself. A qualitative study of the experience of supervision among pastors in the National Church of Iceland). Díana er prestur, faglegur handleiðari og er sérhæfð í vinnuvernd á sálfélagslegu sviði. Hún starfar sem teymisstjóri Stuðningsteymis starfsfólks Landspítala ásamt því að sitja í öryggisnefnd spítalans og er einnig í stjórn Handleiðslufélags Íslands. Díana kynnti doktorsrannsókn sína þann 13. júní sl. á alþjóðlegri þverfaglegri ráðstefnu um klíníska handleiðslu hjá IICCS (International Interdisciplinary Conference on Clinical supervision)  sem haldin var í Bandaríkjunum. Hún mun vera með erindi á afmælisráðstefnu Handleiðslufélags Íslands og fjalla þar um ávinning faglegrar handleiðslu. Sveindís Anna Jóhannsdóttir, formaður Handleiðslufélags Íslands, mun stýra vinnustofu í sumarháskóla ANSE sem haldinn verður í Munchen dagana 18. – 22. ágúst n.k. Hún mun fjalla um  notkun matslista í handleiðslu og hvernig þeir nýtast samhliða ígrundun og samtalinu sem er grunnur í allri handleiðlsu. Þema sumarháskóla ANSE er: An ocean of possibility og er heitið á vinnustofu Sveindísar The inner ocean: A path to deeper self-awareness and well-being . Árið 2020 kom út bókin Handleiðsla til eflingar í starfi  og sat Sveindís sat í ritstjórn bókarinnar en hún er einnig fastur pistlahöfundur hjá Tímariti ANSE. Sveindís er sérfræðingur í félagsráðgjöf með heilbrigðisþjónustu og handleiðslu sem sérsvið. Hún starfar sem framkvæmdastjóri hjá Stendur starfsendurhæfingu. Þjóðfélagið þarf nú sem aldrei fyrr á góðu fagfólki að halda. Fagfólki sem hefur fagmennsku að leiðarljósi og getur á heiðarlegan hátt stutt við fólkið sem leitar til þeirra. Þannig stuðlum við að vellíðan og heilsu einstaklingsins, bættri þjónustu, sterkri vinnustaðamenningu og heilbrigðara samfélagi. Þetta gerir faglegur handleiðari eftir að hafa lokið námi í handleiðslufræðum og fengið viðeigndi þjálfun sem veitir þekkingu og færni til að styðja við sjálfsþekkingu, sjálfstraust og mörk hvers og eins einstaklings. Við á Íslandi höfum verið lengi að taka við okkur hvað varðar að nýta faglega handleiðslu fyrir allar fagstéttir en við í Handleiðslufélagi Íslands finnum að fagfólk og stofnanir eru í auknum mæli að nýta handleiðslu sem sjálfsagðan lið, hvort sem er í forvarnarkyni eða til að efla og styðja við faglegan þroska starfsmanna og líðan í starfi.  Ég óska öllum félögum í Handleiðlsufélagi Íslands til hamingju með 25 ára afmæli félagsins og sérstakar þakkir fá stofnfélagar fyrir metnað og framsýni. Félagið fagnar með morgunverðarfundi mánudaginn 23. júní á Grand Hótel kl. 9:00 – 12:00. Húsið opnar kl. 8:00 og við byrjum með morgunverðarhlaðborði. Dagskrá hefst kl. 9:00 með ávarpi formanns. Síðan eru tvö fræðsluerindi á dagskrá. Díana Ósk Óskarsdóttir mun fjalla um ávinning faglegrar handleiðlsu og Óskar Dýrmundur Ólafsson mun fjalla um handleiðslu og stjórnun og af hverju það sé mikilvægt að sækja nám í handleiðslufræðum. Formlegri dagsrká lýkur með heiðrun og tónlistaratriði en ráðstefnugestir njóta áfram samveru og efla tengsl sín á milli fram til kl. 12:00 Fundarstjóri er Sigrún Margrétar Óskarsdóttir, prestur og faglegur handleiðari. Enn eru örfáir miðar lausir á afmælisráðstefnuna. Skráning fer fram á heimasíðu félagsins en ráðstefnan er öllum opin. https://www.handleidsla.is/radstefnur   Sveindís Anna Jóhannsdóttir, formaður Handleiðslufélags Íslands

Hugrún Linda Guðmundsdóttir, félagsráðgjafi MA, með diplómu í handleiðslu, jákvæðri sálfræði og mannauðsstjórnun. Grein sem birtist í Tímariti félagsráðgjafa 1. tbl. 19. árgangur 2025 Greinin byggir á fyrirlestri sem var haldinn á Félagsráðgjafaþingi 2025 og dregur upp heildræna mynd af streitu, áhrifum hennar, seiglu og mikilvægi handleiðslu sem lykiltækis til forvarna.

Þann 23. júní fagnar Handleiðslufélags Íslands 25 ára afmæli með hátíðar morgunverðarfundi á Grand Hótel. Yfirskrift afmælisfundar er: Brettum upp „fagermarnar“ Dagskrá: 9:00 - 12:00 Ávarp formanns: Sveindís Anna Jóhannsdóttir Erindi: Díana Ósk Óskarsdóttir Erindi: Óskar Dýrmundur Ólafsson Heiðrun: Fyrsti heiðursfélagi Handleiðslufélags Íslands Tónlistaratriði Skráning á ráðstefnuna: https://kto.is/o5hjyp

Dagskrá fundar: Venjuleg aðalfundarstörf Kl. 17:00 - 18.15 1.  Skýrsla stjórnar 2.  Skýrslur nefnda Fræðslunefnd Gæðanefnd Siðanefnd 3. Lagabreytingar    Tillögur um lagabreytingar skulu hafa borist stjórn eigi síðar en viku fyrir  aðalfund og skulu þær liggja frammi fundinum. Til að lagabreytinngar nái fram að ganga þarf 2/3 hluta atkvæða.                 4.  Gjaldkeri gerir grein fyrir fjárhag félagsins. 5.  Kosning í stjórn. 6.  Ákvörðun árgjalds. 7.  Önnur mál. Kl. 18:15 – 18:45 Erindi frá Siðanefnd: Guðrún Helga Sederholm, formaður Siðanefndar fjallar um gervigreind.

ANSE Journal, Volume 8, 2024, Issue 2 https://d5243bef-833f-4937-8808-23c6d3665eae.usrfiles.com/ugd/d5243b_4355431940714ece81819d7b989a18b1.pdf

Sveindís Anna Jóhannsdóttir, formaður Handleiðslufélags Íslands, ritar fasta pistla í Tímarit ANSE. Pistill sem var birtist í seinna tölublaði ársins 2024 ber titilinn: The love for humanity -anywhere, anytime, anyone- ANSE Journal Volume 8 – 2024 – Issue 2 bls. 5-6 . Hér má nálgast tímaritið í heild sinni https://www.professioneelbegeleiden.nl/public/files/ANSE-2024-02-99(1).pdf

Handleiðsla og vellíðan í starfi   Álag í starfi, streita og kulnun er áhyggjuefni og kostnaðarsamt bæði fyrir einstaklinga og  samfélagið í heild sinni. Það er alvarlegt þegar fagfólk treystir sér ekki lengur til að starfa við fagið sem það menntaði sig til. Afleiðingar slíks álag hafa áhrif á líf fólks, m.a. fjölskyldu og félagsleg tengsl svo ekki sé talað um tekjumissi. Stofnanir og fyrirtæki glíma við aðhaldskröfur og geta oft ekki ráðið inn afleysingarfólk vegna veikindaleyfa sem veldur auknu álagi á þá starfsmenn sem fyrir eru. Skapast getur hringrás sem veldur því að verðmætur mannauður tapast með neikvæðum áhrifum á gæði þjónustu og framþróun. Kostnaður er bæði bein fjarvera frá vinnu, ásókn í sjúkrasjóði og  kostnaður sem leggst á einstaklinginn og hans fjöskyldu. Samfélagið ber líka ýmsan beinan og óbeinan kostnað ásamt því að  auka álag á heilbrigðiskerfið og endurhæfingarþjónustu. Flest þekkjum við einhvern sem hefur farið í veikindaleyfi sökum álags og stundum leiðir það til endanlegs brotthvarfs af vinnumarkaði. Handleiðsla er faggrein sem beinir sjónum sínum að samskiptum milli fagfólks, faglegum verkefnum og stofnanamenningu. Handleiðsla veitir tíma og rými til að ígrunda fagleg vinnubrögð í   flóknum aðstæðum. Hún stuðlar að þróun fagfólks, teyma og stofnana og er brýning til fagfólks að skerpa fagleg vinnubrögð. Handleiðsla stuðlar að auknum gæðum í þjónustu og er nýtt til að ígrunda þegar taka þarf flóknar ákvarðanir, hvort sem um er að ræða einstaklingsmál eða þróun þjónustu. Handleiðsla er forvörn gegn streitu og kulnun í starfi og því best að sækja handleiðslu áður en einkenni gera vart við sig. Ef einkenni eru til staðar þá er handleiðsla gagnreynd aðferð sem getur átt stóran þátt í að vinda ofan af þessum einkennum þegar þau mælast yfir klínískum viðmiðum. Líðan í starfi er samstarfsverkefni einstaklinga og atvinnurekanda og því oft nauðsynlegt að hafa skýra handleiðslustefnu á vinnustað til að stuðla að forvörnum og eflingu í starfi.                 Dagur handleiðslu í Evrópu Fimmtudagurinn 21. nóvember er dagur handleiðslu í Evrópu en Evrópusamtök handleiðara ANSE (e. Association for National Organisations for Supervision in Europe - ANSE) voru stofnuð á þessum degi árið 1997. Handleiðslufélag Íslands var samþykkt með fulla aðild að samtökunum þann 19. október síðast liðinn á aðalfundi samtakanna í París, en hafði verið með samstarfsaðild að ANSE frá árinu 2014. Hlutverk ANSE og landssamtaka í hverju landi eru að tryggja gæði og faglega þjónustu handleiðara og stuðla að þróun handleiðslu í Evrópu. Handleiðarar innan ANSE eru þverfaglegur hópur fagfólks sem á það sameiginlegt að hafa sótt sér formlega menntun og þjálfun á sviði handleiðslu. ANSE gaf  árið 2008 út viðmið fyrir hvað nám í handleiðslu þarf að uppfylla til að teljast viðurkennt og hefur uppfært viðmiðið reglulega, nú síðast á aðalfundi 2024. Diplómanám í handleiðslufræðum við Félagsrágðjafardeild Háskóla Íslands uppfyllir þessi viðmið.   Handleiðslufélag Íslands Handleiðslufélag Íslands var stofnað árið 2000. Félagið samþykkti siðareglur fyrir félagið á stofnfundi en á aðalfundi í maí 2023 voru uppfærðar siðareglur samþykktar. Félagið er ætlað fagfólki með löggilt starfsréttindi svo sem félagsráðgjöfum, hjúkrunarfræðingum, kennurum, læknum, prestum/guðfræðingum, iðjuþjálfum, sálfræðingum og sjúkraþjálfurum sem hafa lokið viðurkenndu viðbótarnámi í handleiðslufræðum. Víða erlendis kaupa fyrirtæki, sveitarfélög og stofnanir eingöngu handleiðslu af viðurkenndum handleiðurum sem eru á lista yfir handleiðara hjá sínu landsfélagi. Á Íslandi má finna viðurkennda handleiða á heimasíðunni www.handleidsla.is  Í öðrum löndum þekkist það einnig að fagfólki er skylt að sækja handleiðslu auk lámarks sí- og endurmenntunar árlega til að viðhalda réttindum sínum og aðild að fag- og stéttarfélögum. Á Íslandi eru slíkar kröfur því miður ekki enn farnar að festa sig í sessi en umræðan innan ýmissa fagstétta er þó löngu farin af stað. Handleiðslufélag Íslands vinnur nú að mótun gæðastefnu og gæðaviðmiða fyrir félagið, en ANSE hefur gefið út gæðaleiðbeiningar sem landsfélögin taka mið af. Í dag er fræðslufundur hjá Handleiðslufélagi Íslands sem ber yfirskriftina ,,Hinn handleiddi segir frá og handleiðari tjáir sig“ – Orðræðan um handleiðslu . Fræðslufundurinn hefst kl. 17:00 að Vegmúla 3, 108 Reykjavík og stendur til kl. 19:00.   Stjórn Handleiðslufélags Íslands óskar öllum handleiðurum á Íslandi til hamingju með Evrópudag handleiðara.   Sveindís Anna Jóhannsdóttir, formaður

​

Sveindís Anna Jóhannsdóttir, formaður Handleiðslufélags Íslands, ritar fasta pistla í Tímarit ANSE. Nýtt tölublað ANSE Journal Vol. 8 var að koma út og er það helgað Sumarháskóla ANSE sem fram fór í Budapest í ágúst 2023. Pistillinn ber titilinn With words and beyond - Budapest 2023 - Give peace a chance en þema Sumarháskólans árið 2023 var With words and beyond. Values and identities in an incomprehensible world. Hér má nálgast tímaritið í heild sinni https://d5243bef-833f-4937-8808-23c6d3665eae.usrfiles.com/ugd/d5243b_dc50468dafbd4a418dc8e3368ee56d12.pdf